Борыс Джонсан: Гарантыі Украіне Захад дасць, але не тыя, якія яна хоча
Прэм'ер-міністр Вялікабрытаніі Барыс Джонсан заявіў, што верыць ва ўзгадненне заходнімі краінамі гарантый бяспекі для Украіны, але яны не будуць паўтараць 5-ы артыкул НАТА, што ёсць ключавым патрабаваннем Украіны. Пра гэта піша BBC.
Украінская дэлегацыя на перамовах у Стамбуле 29 сакавіка перадала расійскай сваё бачанне міжнароднага дакумента, які зафіксуе гарантыі бяспекі для Украіны. Ключавое патрабаванне — гарантыі бяспекі Украіны павінны быць аналагічныя 5-му артыкулу НАТА.
Паводле гэтага артыкула, калі нехта нападзе на Украіну, то гаранты павінны на працягу трох дзён правесці кансультацыі і забяспечыць ахвяры агрэсіі неабходную дапамогу: даць узбраенне, увесці свае войскі і закрыць неба. Сярод гарантаў Украіна бачыць краіны Рады Бяспекі ААН, у прыватнасці, Вялікабрытанію, Кітай, ЗША, Францыю, Турцыю, Германію, Канаду, Польшчу, Італію і Ізраіль.
Джонсан верыць, што заходнія краіны падтрымаюць патрабаванні Украіны гарантаваць бяспеку ад будучых нападаў.
Але ён бачыць гэтыя гарантыі праз наданне ўзбраення, навучанне ўкраінскіх вайскоўцаў і абмен разведвальнымі дадзенымі.
Джонсан заявіў, што гэта дазволіць Украіне забяспечыць «стрымліванне баявых дзеянняў», гэта значыць адбіць імкненне агрэсара атакаваць, зрабіўшы яго атаку невыканальнай або малаверагоднай.