Падаляк: На вайне штодня гіне 100-200 украінскіх вайскоўцаў
На вайне ва Украіне штодня гінуць 100-200 украінскіх вайскоўцаў, заявіў дарадца кіраўніка офіса прэзідэнта Украіны Міхаіл Падаляк у эфіры Newshour BBC World Service. Гэта самыя вялікія лічбы ўкраінскіх страт, апублікаваныя ўладамі Украіны за ўвесь час вайны.
Фота: GETTY IMAGES
Як заявіў Падаляк, адна з галоўных прычын вялікай колькасці страт — адсутнасць парытэту паміж украінскімі і расійскімі вайсковымі магчымасцямі. Украіне трэба да 300 ракетных сістэм, каб дасягнуць парытэту з агнявой магутнасцю Расіі і вызваліць акупаваную тэрыторыю, дадаў ён.
Падаляк адзначыў, што «пакуль Расія не пацярпіць сур'ёзнае вайсковае паражэнне, ніякая форма дыялогу не будзе магчымая, і яны (расійскія вайскоўцы) будуць працягваць спрабаваць захапіць» частку Украіны.
1 чэрвеня прэзідэнт Украіны Уладзімір Зяленскі заявіў, што ўкраінская армія кожны дзень губляе ў баях 60-100 салдат забітымі і 500 параненымі. Самая складаная сітуацыя, па яго словах, склалася на ўсходзе Украіны ў Севераданецку і Лісічанску. На прэс-канферэнцыі ў траўні Зяленскі таксама казаў, што ў баях на ўсходзе краіны штодня гінуць да 100 украінскіх салдат.
Учора міністр абароны Аляксандр Рэзнікаў заявіў, што штодня гіне каля 100 салдат, а 500 атрымліваюць раненні.