Пуцін спрасціў атрыманне расійскага грамадзянства для грамадзян Украіны
Уладзімір Пуцін спрасціў атрыманне расійскага грамадзянства для грамадзян Украіны. Адпаведны ўказ апублікаваны 11 ліпеня. Раней спрошчаны парадак дзейнічаў для жыхароў асобных тэрыторый Данецкай і Луганскай абласцей, падкантрольных прарасійскім сепаратыстам, і часткова занятых расійскімі войскамі Херсонскай і Запарожскай абласцей.
У новай фармулёўцы дакумент прадугледжвае, што грамадзяне Украіны, прызнаных Расіяй сепаратысцкіх рэспублік на ўсходзе Украіны, а таксама асобы без грамадзянства, якія пастаянна жывуць ва Украіне, могуць звярнуцца з заявамі аб прыёме ў грамадзянства Расіі ў спрошчаным парадку.
Раней прарасійскія крыніцы паведамлялі, што на тэрыторыях Херсонскай і Запарожскай абласцей запрацавалі пункты выдачы расійскага грамадзянства. Пасля пераходу гэтых рэгіёнаў пад кантроль расійскіх вайскоўцаў украінскую мясцовую ўладу там змянілі новыя адміністрацыі, падкантрольныя Маскве.