У расійскі палон трапіў украінскі праваабаронца, які дапамагаў беларускім уцекачам і журналістам
Сузаснавальнік Цэнтра правоў чалавека ZMINA і «Громадське радіо», праваабаронца Максім Буткевіч трапіў у расійскі палон у часе баявых дзеянняў у раёне населеных пунктаў Залатое і Горскае Луганскай вобласці, піша Радыё Свабода.
Як паведаміў Цэнтр правоў чалавека ZMINA, маці Максіма Буткевіча не ведае, дзе ён знаходзіцца і ў якім стане.
Максім Буткевіч — украінскі праваабаронца і журналіст. У сакавіку 2022 году ён пайшоў на службу ва ўкраінскае войска, каб абараняць Украіну ад расійскай агрэсіі.
Максім Буткевіч спецыялізуецца на абароне правоў уцекачоў. У красавіку 2021 года ён першым паведаміў аб незаконных дзеяньнях СБУ ў дачыненні да беларускага анархіста Аляксея Балянкова.
Праваабаронца таксама ўдзельнічаў у шэрагу захадаў, прысвечаных праблемам легалізацыі беларусаў, якія пасля прэзідэнцкіх выбараў у 2020 годзе ўцякалі ад палітычнага пераследу з Беларусі ва Украіну.