У Віцебскім раёне ў лесе заблукалі бабуля з дарослым унукам
Здарэнне адбылося ў панядзелак. У 17:52 ратавальнікам паступіла паведамленне пра тое, што паблізу вёскі Войтава згубіліся два чалавекі, паведамляе МНС.
Да месца здарэння было накіраванае аддзяленне пажарнай аварыйна-ратавальнай часці №4 Віцебскага РАНС. На пошукі таксама былі прыцягнутыя работнікі міліцыі і лясгаса.
Спачатку ратавальнікі спрабавалі датэлефанавацца да людзей, якія заблукалі, але іх тэлефоны былі па-за зонай доступу.
Тады яны прынялі рашэнне спыніцца ля лесу і ўключаць гук сігнальна-размоўнай прылады цыстэрны. І праз нейкі час яны ўбачылі зніклых.
Тыя расказалі, што, пачуўшы гук сірэны, самі пачалі рухацца ў яго бок і неўзабаве выйшлі да машыны ратавальнікаў. У медыцынскай дапамозе яны не мелі патрэбы.