Справу віцебскай журналісткі Таццяны Мацвеевай накіравалі на дапрацоўку
Сёння меў прайсці суд над затрыманай былой журналісткай «Тутбая».
Паводле складальніка адміністрацыйнага пратакола, супрацоўніка Кастрычніцкага РАУС Уладзіслава Шышкаўца, журналістка без дазволу райвыканкама размясціла на сваёй старонцы ў Фэйсбуку фотаздымак з бела-чырвона-белым сцягам, чым «выказала сваю грамадска-палітычную пазіцыю».
Таццяна Мацвеева папрасіла суд, каб справу супраць яе спынілі, бо яна не згодная з абвінавачаннем.
Але суддзя Уладзімір Царыкаў скончыў працэс пастановай пра вяртанне матэрыялаў у міліцыю для выпраўлення хіб: складальнік пратакола памыліўся з месцам нараджэння журналісткі і не ўказаў, якое канкрэтна палажэнне заканадаўства яна парушыла.
Мацвееву затрымалі 29 ліпеня, але 31 ліпеня яна была выпушчаная да суда.