Размалявалі вайсковую тэхніку, выстаўленую ў скверы ў цэнтры Барысава
Экспанаты вайсковай тэхнікі, выстаўленыя ў Барысаўскім цэнтральным скверы, хтосьці размаляваў і падрапаў. Паводле чыноўнікаў ЖКГ, такім чынам абышліся як мінімум з трыма экспанатамі.
Камеры відэаназірання, усталяваныя на будынках вакол сквера, не змаглі зафіксаваць людзей, якія размалявалі тэхніку. Мяркуюць, што гэта зрабілі дзеці або падлеткі.
ЖКГ ужо прыцягнула для ліквідацыі надпісаў вайскоўцаў 814-га цэнтра тэхзабеспячэння вайсковых часцей, якія базуюцца ў Барысаве. Таксама кіраўніцтва ЖКГ мае намер звярнуцца да раённай адміністрацыі з просьбай палепшыць відэаназіранне за зонай адпачынку ў скверы.