«Не працуюць, а сацпаслугі атрымліваюць, як усе. Несправядліва» — Лукашэнка зноў узяўся за «дармаедаў»
На нарадзе па пытаннях бяспекі Аляксандр Лукашэнка заявіў, што пры сустрэчы з эканамічным блокам закраналася таксама праблема «значнай колькасці дармаедаў, якія не жадаюць уладкоўвацца на працу».
Паводле Лукашэнкі, у Беларусі плануецца прыняць меры для таго, каб зрабіць «больш справядлівай» сістэму аказання сацыяльных паслуг для грамадзян, якія працуюць, і тых, хто не працуе.
«Мы цяпер выпрацоўваем меры — што рабіць з імі. Правільна сказаў старшыня прафсаюзаў Міхаіл Сяргеевіч Орда: некалькі тысяч не працуюць, а сацыяльныя паслугі, у тым ліку адукацыі і асабліва аховы здароўя, яны атрымліваюць так, як усе. Гэта справядліва? Несправядліва», — мяркуе Лукашэнка.
Лукашэнка перакананы, што «ў аснове палітыкі Беларусі заўсёды была і застаецца канцэпцыя справядлівасці», яе ён будзе «прытрымлівацца і ў далейшым».