«Вайна не стане карацейшай». Міністр абароны Літвы — пра прыбыццё расійскіх вайскоўцаў у Беларусь
Арвідас Анушаўскас у фэйсбуку пракаментаваў апошнія ваенныя навіны, сярод іх — разгортванне «рэгіянальнай групоўкі войскаў» у Беларусі.
«Міністэрства абароны Беларусі абвясціла, што ў рамках рэгіянальнай вайсковай групоўкі з Расіі прыбудуць 9000 вайскоўцаў, каля 170 танкаў і да 100 гармат і мінамётаў. Але вываз танкаў з беларускіх рэзерваў і замена іх расійскімі — гэта нейкі дысананс. Падобна, што часткова мабілізаваных прывязуць вучыцца на беларускія вайсковыя палігоны і навучальныя цэнтры. Гэта значыць толькі адно — працягласць вайны не становіцца карацейшай».