Супраць Навальнага распачалі новую крыміналку
Пра завядзенне новай крымінальнай справы на Аляксея Навальнага паведамілі ў сацсетках палітыка ад ягонага імя.
Па словах палітыка, справа заведзеная ў сувязі з тым, што ён:
- прапагандаваў тэрарызм, заклікаў да яго;
- публічна заклікаў да экстрэмізму;
- фінансаваў экстрэмісцкую дзейнасць;
- рэабілітаваў нацызм.
Следства лічыць экстрэмісцкімі, у прыватнасці, матэрыялы юцюб-канала «Папулярная палітыка», які вядуць паплечнікі Навальнага.
Адвакаты, па словах Навальнага, падлічылі, што па сукупнасці ўсіх гэтых артыкулаў яму могуць налічыць яшчэ гадоў з 30 зняволення.
22 сакавіка гэтага года Ляфортаўскі суд Масквы прыгаварыў Аляксея Навальнага да дзевяці гадоў калоніі строгага рэжыму па абвінавачванні ў махлярстве і непавазе да суда.
У чэрвені 2022 года Навальнага этапавалі ў калонію строгага рэжыму №6 у пасёлку Мелехава Уладзімірскай вобласці. Там яго адправілі ў адзін атрад з асуджанымі за забойствы.