У сямі расійскіх рэгіёнах прайшлі вобшукі
Паліцэйскія праводзяць 29 снежня серыю ператрусаў у сямі расійскіх рэгіёнах у рамках крымінальнай справы аб «фэйках» пра Узброеныя сілы РФ, заведзенай у дачыненні да былога дэпутата Дзярждумы Ільі Панамарова.
Ілья Панамароў
Раніцай 29 снежня «ОВД-Інфо» паведаміла пра ператрусы ў маскоўскіх муніцыпальных дэпутатаў Сяргея Цукасава, Уладзіміра Залішчака і Міхаіла Лабанава.
Таксама пра ператрус у сябе дома распавёў журналіст выдання 72.ru Артур Галіеў. «У мяне прайшоў ператрус па справе Панамарова. Без паняцця, якім бокам я з ім звязаны. І паняцця не маю, чым ён займаецца. Канфіскавалі тэлефон і мой стары ноўт», — напісаў ён у тэлеграме.
У Цюмені затрымалі шэф-рэдактара сайта 86.ru Мікіту Кіфарука, у яго забралі ўсю тэхніку.
Ілью Панамарова завочна арыштавалі паводле справы аб «фэйках» пра войска 30 жніўня. У пачатку верасня па гэтай справе прайшлі ператрусы ў некалькіх журналістаў, адміністратараў тэлеграм— і ютуб-каналаў.