Зяленскі аб пуцінскім спыненні агню: Найлепшы спосаб спыніць агонь — гэта вывад расійскіх войскаў
Прэзідэнт Украіны Уладзімір Зяленскі ўслед за чальцамі сваёй каманды адмёў заяву расійскага лідара Пуціна аб калядным спыненні агню як крывадушную спробу атрымаць перадышку.
Фота: AP/Jacquelyn Martin
Зяленскі прысвяціў заяве Пуціна другую палову свайго штовечаровага відэазвароту і прамовіў гэтую частку па-руску, у форме звароту да грамадзян Расіі.
Украінскі прэзідэнт нагадаў, што Украіна ўжо прапанавала сваю «формулу міру», але галоўны элемент у ёй — сыход расійскіх акупантаў..
«Вывядзенне расійскіх акупацыйных войскаў з тэрыторыі нашай краіны — гэта гарантаваны і надзейны спосаб спыніць агонь, чалавечыя страты і наогул вайну», — сказаў Зяленскі.
«Цяпер яны хочуць выкарыстаць Каляды як прыкрыццё, каб хоць ненадоўга спыніць прасоўванне нашых хлопцаў на Данбасе і падагнаць бліжэй да нашых пазіцый тэхніку, боепрыпасы і мабілізаваных. Што гэта дасць? Толькі чарговае павелічэнне страт. Усе ў свеце ведаюць, як Крэмль выкарыстоўвае перадышкі на вайне, каб працягнуць вайну з новай сілай», — працягнуў прэзідэнт Украіны.
«Вайна скончыцца, калі вашы салдаты або сыдуць, або мы іх выганім. Такім чынам, хай забіраюць унітазы — яны ім у дарозе спатрэбяцца — і вяртаюцца да сябе», — сказаў на заканчэнне Зяленскі.