У Гомелі завялі крымінальную справу за пашкоджаную кнігу скаргаў
Інцыдэнт адбыўся ў рэстаране самаабслугоўвання на вуліцы Савецкай у снежні. Двое мужчын узялі ежу і спіртное, расплаціліся на касе.
Крыху пазней яны папрасілі афіцыянта прынесці сурвэткі. Дзяўчына патлумачыла, што фармат установы прадугледжвае, што наведвальнікі павінны гэта рабіць самастойна. Мужчыны засталіся незадаволеныя такім адказам і запатрабавалі кнігу скаргаў і прапаноў.
Адміністратар установы зноў растлумачыў правілы працы рэстарана, але патрабаванне кліентаў выканаў. «Адзін з іх напісаў сутнасць прэтэнзій, а ў другога з-за стану гэта не атрымлівалася. Раззлаваны гэтай акалічнасцю, 28-гадовы жыхар Добрушскага раёна вырваў з дакумента гэты аркуш. Работнікі ўстановы выклікалі міліцыю», — распавялі ў міліцыі.
Па факце пашкоджання афіцыйных дакументаў распачата крымінальная справа.