Учора адбыліся выбухі на расійскім аэрадроме ў Краснадарскім краі. Блогеры кажуць пра беспілотнік, улады — пра вучэнні
Учора ўвечары СМІ і тэлеграм-каналы апублікавалі фота, на якім бачны меркаваны ўчастак узгарання ў раёне вайсковага аэрадрома ў Ейску Краснадарскага краю.
Прарасійскія вайсковыя блогеры назвалі прычынай выбухаў атаку беспілотнікаў. Па звестках тэлеграм-канала «Рыбарь», дрон Ту-141 «Стрыж» упаў побач з лётным полем, не пашкодзіўшы самалёты.
Мясцовыя ўлады адмаўляюць інфармацыю аб нападзе на аэрадром і тлумачаць гукі выбухаў вучэннямі.
«Стрыжы» ў снежні мінулага года выкарыстоўваліся для ўдараў па аэрадромах у Саратаўскай і Разанскай абласцях, на якіх базіруецца расійская стратэгічная авіяцыя.