Лукашэнка ляціць ва Украіну
Кіраўнік Беларусі наведае Украіну 5—6 лістапада.
Аляксандр Лукашэнка 5—6 лістапада наведае Украіну з афіцыйным візітам.
Пра гэта паведамляюць украінскія СМІ са спасылкай на прэс‑сакратара Міністэрства замежных спраў Украіны Віталя Джыгуна.
Паводле яго слоў, у рамках візіту запланаваны перамовы аб прадаўжэнні дэмаркацыі ўкраінска‑беларускай мяжы, актывізацыі палітычнага дыялогу, а таксама падпісанне шэрагу двухбаковых дакументаў. Запланаваны сустрэчы Лукашэнкі з прэзідэнтам Украіны Віктарам Юшчанкам, прэм`ер‑міністрам Украіны Юліяй Цімашэнка, старшынёй Вярхоўнай Рады Украіны Уладзімірам Літвінам.
Запрашэнне наведаць Украіну прэзідэнт Беларусі атрымаў 19 кастрычніка ад міністра замежных спраў Украіны Пятра Парашэнкі падчас яго візіту ў Мінск.
Апошні раз Лукашэнка і Юшчанка сустракаліся 9 кастрычніка на саміце СНД ў Кішынёве.