Скарацілі колькасць АЗС для запраўкі фур з Еўрасаюза
Пералік АЗС, на якіх могуць запраўляцца грузавікі з нумарамі Еўрасаюза, стаў яшчэ карацейшым. Гэта прадугледжана пастановай урада, апублікаванай на Нацыянальным прававым партале.
У маі мінулага года сярод мер у адказ на санкцыі Еўрасаюза беларускія ўлады абавязалі кіроўцаў фур з нумарамі краін Еўрасаюза запраўляцца толькі на вызначаных АЗС. У спіс увайшло 15 заправак паблізу 10 пунктаў пропуску, побач з якімі арганізавана перачэпка грузаў. На такіх АЗС устаноўлены спецыяльныя цэны на паліва, большыя, чым на звычайных запраўках.
Цяпер у гэтым спісе застаецца ўсяго восем заправак: па дзве АЗС для грузавікоў, якія заязджаюць праз пункт пропуску «Казловічы», а таксама «Прывалка» і «Відзы». Па адной запраўцы прадугледжана дакументам для пунктаў пропуску «Беняконі» і «Бераставіца».
За запраўку еўрапейскага грузавіка ў іншых, не прызначаных для гэтага месцах, прадугледжаны штрафы ад 2 да 100 базавых велічынь (на гэты момант базавая — 37 рублёў).
Чытайце таксама:
Як закрыццё «Баброўнікаў» і іншыя абмежаванні паўплывалі на дастаўку тавараў
Кіроўцаў еўрасаюзных фураў судзяць за запраўку ў Беларусі не тым палівам
АЗС абавязалі паведамляць пра некаторых кіроўцаў, якія ў іх купляюць паліва