У Маскве арыштавалі студэнта-гісторыка за чытанне мемуараў афіцэра СС у метро
Басманны раённы суд Масквы арыштаваў на пяць сутак студэнта-гісторыка Уладзіміра Паніна за тое, што той чытаў у метро мемуары былога афіцэра СС, піша Meduza.io.
Згодна з карткай справы, раніцай 6 мая Панін у вагоне метро «трымаў у абедзвюх руках» кнігу Петэра Ноймана «Чорны марш. Успаміны афіцэра СС»» На вокладцы кнігі была фатаграфія нямецкага салдата ў касцы, на якой быў намаляваны сімвал СС.
Студэнта затрымалі на адной са станцый. Ноч ён правёў у пастарунку, а на наступны дзень яго прывезлі ў Басманны суд.
У судзе студэнт спрабаваў даказаць, што ідэалогій нацызму і фашызму не прытрымліваецца, а кнігу вывучаў «як гістарычную крыніцу». Тым не менш, суддзя прызнала Паніна вінаватым у здзяйсненні дзеянняў, накіраваных на прапаганду або дэманстрацыю нацысцкай сімволікі. Акрамя таго, суддзя пастанавіла знішчыць канфіскаваны асобнік кнігі.