У Нямеччыне беларус учыніў ДТЗ на 220 тысяч еўра шкоды
У нямецкай зямлі Мекленбург — Пярэдняя Памеранія беларус на фуры трапіў у ДТЗ, удзельнікамі якога сталі адразу чатыры грузавікі. Пра гэта паведамляе сайт «Беларусь і свет» са спасылкай на мясцовую паліцыю.
Фота: пажарная дружына абшчыны Брэнц
Інцыдэнт адбыўся 19 ліпеня каля 16:49 на трасе BAB 24 у напрамку Гамбурга ля горада Нойштат-Глеве, недалёка ад аднайменнай развязкі.
Праз будаўнічыя работы абочына была перакрытая грузавіком і загараджальным прычэпам. З неўстаноўленай пакуль прычыны наш 58-гадовы суайчыннік урэзаўся ў гэты прычэп.
У выніку ўдару загараджальны прычэп адкінула на тры іншыя грузавікі, якія знаходзіліся ў раёне будаўнічай пляцоўкі.
Фота: пажарная дружына горада Нойштат-Глеве
У выніку аварыі 61-гадовы польскі кіроўца грузавіка з загараджальным прычэпам пацярпеў сур'ёзна, яшчэ адзін кіроўца — 59-гадовы немец — атрымаў лёгкія траўмы.
Транспартным сродкам была нанесена матэрыяльная шкода на 220 тысяч еўра. Аўтабан для ліквідацыі наступстваў перакрывалі на 4 з паловай гадзіны.