«Не праглядаецца сумеснае вядзенне бою». Бундэсвер звярнуў увагу на недахопы ўкраінскага контрнаступлення

Узброеныя сілы Германіі раскрытыкавалі дзеянні УСУ падчас контрнаступлення. Маўляў, яны няправільна выкарыстоўваюць асвоеныя на Захадзе метады вядзення вайны, піша «Еўрапейская праўда» са спасылкай на выданне Bild, якое азнаёмілася з сакрэтным дакументам бундэсвера.

Фота: AP

Сярод галоўных недахопаў Узброеных cіл Украіны называюць значэнне падзелу баявых падраздзяленняў, праз што «не праглядаецца сумеснае вядзенне бою». Гэта не толькі павялічвае «небяспеку дружалюбнага агню», то-бок агню ў адказ з боку ўласных войскаў, але і «ў кірунку галоўнага ўдару адсутнічаюць манеўраныя падраздзяленні для разгортвання наступу або ўстанаўлення агнявой перавагі», лічаць у бундэсверы.

Іншымі словамі, праз тое, што Украіна разбівае брыгады, якія прайшлі падрыхтоўку на Захадзе, на групы з 10-30 салдат, ізаляваныя ад астатніх войскаў, ні заходняя падрыхтоўка, ні лепшае ўзбраенне, ні вялікая колькасць наяўных салдат не маюць значэння.

Акрамя таго, крытычна ў бундэсверы выказаліся адносна навучання вопытных украінскіх вайскоўцаў, якія, паводле іх слоў, горш засвойваюць прынцыпы заходняй падрыхтоўкі або наогул не бяруць у ёй удзел.

У дакуменце бундэсвера гаворыцца, што камандны склад дэманструе «часам значныя недахопы на адпаведным узроўні ў кіраўніцтве і ўжыванні камандных працэсаў, што прыводзіць да часткова няправільных і небяспечных рашэнняў».

Гэтымі фактарамі — падзел брыгад і адсутнасць належнай падрыхтоўкі ў камандным складзе — можа тлумачыцца павольнае прасоўванне ўкраінскіх сіл падчас контрнаступлення, канстатуюць у Германіі.

Чытайце таксама:

«Гэта не камп'ютарная гульня». Кіраўнік Мінабароны Украіны заявіў, што контрнаступ УСУ адстае ад графіка, але ідзе па плане

Рэзнікаў: Вайна скончыцца да наступнага лета, Украіна пераможа

Дзяржсакратар ЗША заявіў, што Украіна адваявала палову захопленай тэрыторыі

Каментары да артыкула