Жыхару Салігорска не даюць жыцця каналізацыйныя мухі
У адным з салігорскіх дамоў развяліся каналізацыйныя мухі. Разбірацца прыехала камісія.
Скрын відэа Салігорскага тэлевізійнага канала
Як расказвае Салігорскі тэлеканал, камісія ў складзе супрацоўнікаў ЖКГ, Раённага цэнтра гігіены і эпідэміялогіі і водаканала прыехала глядзець, што адбываецца ў доме на Заслонава, 46.
Каналізацыйныя мухі з'яўляюцца ў сырых і цёплых месцах, там, дзе ёсць адкіды, якія гніюць. У кватэры яны трапляюць праз шчыліны ў перакрыццях і падлогах, праз адтуліны ў сцёкавых трубах.
Водаканал кажа, што з іх боку ўсё ў парадку.
У кватэрах камісія мух не пабачыла, але мухі былі ў калідоры на першым і другім паверхах.
Рэкамендацыя санэпідцэнтра — правесці дэзынсекцыю ў калідорах і на лесвічнай пляцоўцы. Яе зробяць на працягу 5—7 працоўных дзён.
Скрын відэа Салігорскага тэлевізійнага канала
Адзін з жыхароў дома Мікалай Навіцкі кажа, што ў кватэры жыве толькі ўзімку. Мухі, скардзіцца ён, перашкаджаюць яму з 2015 года.
«Хачу, каб памянялі мне жыллё або вытруцілі мух», — эмацыйна кажа ён.
Мужчына просіць таксама прыватызаваць сацыяльнае жыллё, тады ён зробіць рамонт за ўласныя грошы. Але, як сцвярджаюць у сюжэце, законных падстаў для гэтага выпадку няма.