Беларуса, які збіў веласіпедыстку ў польскай Познані, вызвалілі да суда. Сям'я ў шоку
Аналіз паказаў, што кіроўца быў цвярозы.
Фота: epoznan.pl
Суддзя вызваліў да суда таксіста з Беларусі, які ў лютым збіў веласіпедыстку ў Познані. Сям'я ахвяры шакаваная, піша Most.
Нагадаем, трагедыя адбылася 9 лютага на вул. Дамброўскага ў Познані. 27-гадовая веласіпедыстка пераязджала дарогу. Яна не злезла з ровара, бо на тым пераходзе была спецыяльная зона для раварыстаў.
У гэты час у яе ўрэзаўся аўтамабіль Uber, за рулём якога знаходзіўся 35-гадовы грамадзянін Беларусі. Дзяўчыну рэанімавалі, але выратаваць яе не ўдалося.
Аналіз паказаў, што кіроўца быў цвярозы. Але паколькі ён паводзіў сябе дзіўна, у яго ўзялі аналіз крыві на наркотыкі. Аналіз выявіў сляды прыёму марыхуаны. Ступень наркатычнага ап'янення адпавядала больш чым палове праміле алкаголю.