Чыноўнік расійскага Мінкультуры скраў на рэканструкцыі Эрмітажа 12 мільёнаў даляраў
Барысу Мазо далі восем з паловай гадоў калоніі.
Фота: тэлеграм-канал «Дождя»
Куйбышаўскі раённы суд Санкт-Пецярбурга прысудзіў былога дырэктара дэпартамента кіравання маёмасцю і інвестыцыйнай палітыкі Мінкультуры Расіі Барыса Мазо да 8,5 гадоў калоніі агульнага рэжыму і штрафу 600 тысяч рублёў (6300 даляраў) па справе аб махлярстве, паведамляе тэлеканал «Дождь».
Мазо праходзіў у якасці аднаго з абвінавачаных па «справе рэстаўратараў». Яго разам з намеснікам міністра культуры Рыгорам Пірумавым абвінавачвалі ў крадзяжы больш як 900 мільёнаў рублёў (тады гэта было амаль 14 млн даляраў) бюджэтных грошай пры рэканструкцыі Эрмітажа ў 2015 годзе.
Паводле версіі следства, Мазо з Пірумавым стварылі «злачынную суполку», у склад якой увайшлі яшчэ некалькі чалавек, і, заключыўшы дзяржкантракт на будаўніцтва комплексу будынкаў і фондасховішча Эрмітажа з падкантрольнай ім кампаніяй «Мехбудтранс», атрымалі больш за 900 млн рублёў (14 млн даляраў). З гэтай сумы ім удалося легалізаваць амаль 800 млн рублёў (12,3 млн даляраў).
У 2018 годзе Мазо быў завочна арыштаваны Басманным судом і абвешчаны ў міжнародны вышук. У лістападзе 2019 года Мазо затрымалі ў Вене па падазрэнні ў адмыванні грошай пры куплі элітнай нерухомасці ў іспанскай Марбельі. На наступны дзень суд вызваліў яго пад заклад у 25 тысяч еўра. Па словах яго адваката, Мазо пераехаў у Аўстрыю на лячэнне яшчэ да крымінальнай справы супраць яго ў Расіі.
У 2021 годзе Мазо быў экстрадаваны ў Расію на запыт Генпракуратуры. Мазо ў судзе віны не прызнаў.