Расійскія вайскоўцы зладзілі перастрэлку на Херсоншчыне, ёсць забітыя — Astra
Адзін з акупантаў пасварыўся з камандзірам і пачаў страляць з аўтамата. Гэта здарылася ў занятым расіянамі сяле Райскае Кахоўскага раёна Херсонскай вобласці.
Па звестках тэлеграм-канала ASTRA, у Следчы камітэт Расіі паступілі матэрыялы праверкі па факце перастрэлкі.
Па папярэдніх звестках, вайсковец па прозвішчы Місюраеў пасварыўся з камандзірам Кугаем (пазыўны «Уцёс»). Падчас канфлікту Місюраеў пачаў страляць з аўтамата, застрэліўшы камандзіра Кугая і яшчэ аднаго вайскоўца Хрыбтова. Абодва загінулі.
Пасля гэтага Місюраеў паспрабаваў з'ехаць з месца здарэння на аўтамабілі, аднак іншыя вайскоўцы адкрылі па ім агонь з аўтамата. Місюраеў таксама загінуў на месцы.
Крымінальная справа, па даных ASTRA, дагэтуль не распачатая.