Егіпет адкрыў пункт пропуску для эвакуацыі з сектара Газа
КПП Рафах на мяжы Газы і Егіпта адкрыўся для эвакуацыі замежнікаў і параненых. З сектара Газа выехалі дзясяткі чалавек з замежнымі пашпартамі.
Людзі пераходзяць на егіпецкі бок мяжы з сектарам Газа, Рафах, 1 лістапада 2023 г. Фота: Hatem Ali / AP Photo
Егіпет упершыню адкрыў КПП пасля нападу баевікоў ХАМАС на Ізраіль. Адкрыццё КПП адбылося пры садзейнічанні Катара, які заключыў пагадненне паміж Ізраілем, Егіптам і Хамасам, піша Reuters.
Пагадненне дазволіць уладальнікам замежных пашпартоў і некаторым цяжкапараненым людзям пакінуць Газу. Паводле паведамленняў СМІ, сектар Газа пакіне прыкладна 90 параненых палесцінцаў і каля 450 замежнікаў і асоб з падвойным грамадзянствам.
Як доўга пункт будзе адкрытым, невядома.
КПП Рафах — адзіны памежны пераход з сектара Газа, які не кантралюецца Ізраілем. Яшчэ два КПП у сектары Газа — Эрэз і Керэм Шалом — выходзяць на тэрыторыю Ізраіля і не працуюць. Праз Рафах, у ліку іншага, у сектар Газа паступае гуманітарная дапамога, піша «Медуза».