У Мінск прыляцеў легендарны Іл-76, захоплены талібамі ў 1990-х
Экіпаж прабыў у палоне 378 дзён і здолеў уцячы.
У аўторак у 22:51 у Нацыянальным аэрапорце «Менск» прызямліўся Іл-76ТД (RA-76842), які эксплуатуе расійская авіякампанія Авіякан Цытатранс.
Па ўсім відаць, борт прыбыў на тэхнічнае абслугоўванне на Мінскі завод грамадзянскай авіяцыі №407. Самалёту ўжо 29 гадоў — вельмі паважаны ўзрост, але адметны гэты борт зусім не гэтым, паведамляе Motolkohelp.
Менавіта гэты самалёт быў перахоплены тэрарыстамі руху Талібан у небе над Афганістанам 3 жніўня 1995 года.
Талібы паднялі ў неба знішчальнік і прымусілі Іл-76 да пасадкі ў Кандагары. На борце Іл-76 знаходзілася сем членаў экіпажа, а перавозілі яны боепрыпасы для афганскага ўрада.
Увесь экіпаж разам з самалётам быў узяты ў палон, у якім яны знаходзіліся 378 дзён.
16 жніўня 1996 года, пад маркай чарговага абслугоўвання самалёта, экіпажу ўдалося запусціць рухавікі і ўцячы праз Іран на рэштках паліва.
Па матывах гэтай гісторыі быў зняты расійскі фільм «Кандагар».