У Мінску развіталіся з фатографам Уладзімірам Парфянком
Правесці ў апошні шлях дзеяча культуры і мастацтва, творцу, які паўплываў не на адно пакаленне фатографаў, мастакоў, крытыкаў, прыйшло больш за 100 чалавек.
Фота: Reform.by
18 студзеня ў Мінску ў «Рытуальным доме» па адрасе вуліца Кульман, 33а адбылося развітанне з выбітным беларускім фатографам, куратарам і аналітыкам фатаграфіі Уладзімірам Парфянком, піша Reform.by.
На цырымоніі развітанні прысутнічалі блізкія, сябры, калегі фатографа, прадстаўнікі Беларускага саюза мастакоў, Беларускага грамадскага аб’яднання фатографаў, Беларускага саюза дызайнераў.
Словы развітання, пашаны і любові да Уладзіміра Парфянка падчас цырымоніі гучалі ад тых, хто ў Беларусі, але таксама і па-за яе межамі. Сябры фатографа зачыталі пасланні ад калег і аднадумцаў, якія знаходзяцца ў іншых краінах.