Рэкрута ПВК «Вагнер» з Узбекістана асудзілі на пяць гадоў за наёмніцтва ва Украіне. Ён нават не даехаў да фронту
Аляксей Хаматханаў вылецеў у маі 2023 года з роднага Ташкента ў Маскву і неўзабаве падпісаў кантракт з ПВК «Вагнер», пасля чаго адправіўся на трэніровачную базу ў Краснадарскім краі.
Фота: Readovka
Да фронту даехаць не паспеў, ПВК была рэарганізавана, а Аляксей трапіў у міграцыйны цэнтр у Сахараве, распавяла Readovka яго маці Таццяна.
Там ён выказаў жаданне падпісаць кантракт з Мінабароны. Маўляў, з самага пачатку хацеў ваяваць з «украінскім нацызмам». Спачатку яму адказалі згодай, але замест гэтага дэпартавалі на радзіму.
Ва Узбекістане ў лістападзе мінулага года яго і арыштавалі, а праз два месяцы асудзілі на пяць гадоў пазбаўлення волі па артыкуле «наёмніцтва».
Па словах маці, суддзя не стаў хаваць, што справа яе сына — выключна палітычная і што ён быў вымушаны адправіць яго ў турму, баючыся вынесці змякчаны прысуд. Жанчына падала апеляцыю і можа толькі спадзявацца на тое, што справа будзе перагледжана.
Раней паведамлялася, што аналагічныя тэрміны за наёмніцтва ў ПВК «Вагнер» былі вынесеныя ў Казахстане і Кыргызстане.