У Гродне варажбітка здымала псуту з 81-гадовай жанчыны і зняла грошы. Цяпер яе шукае міліцыя
У сярэдзіне студзеня пажылая гарадзенка аказалася ў няпростай жыццёвай сітуацыі. Разважаючы над сваімі праблемамі, яна вырашыла, што яе нехта сурочыў, таму стала шукаць дапамогі.
У хуткім часе пенсіянерка знайшла 37-гадовую варажбітку з Мастоўскага раёна. Тая пацвердзіла, што на пажылой жанчыне ляжыць псута і паабяцала пазбавіць яе ад усіх бед. Канешне, за працэдуру ачышчэння ўзяла з пенсіянеркі 500 рублёў, паведамляе абласная міліцыя.
Аднак праз некаторы час жанчына зразумела, што рытуал не прынёс эфекту, і звярнулася ў міліцыю.
Дзеянні варажбіткі кваліфікавалі па артыкуле «Махлярства». Ёй пагражае да трох гадоў пазбаўлення волі. Зараз міліцыя шукае пацярпелых.
«Варажбітка» Алена Аляксееўна Юзэпчук, 05.03.86, якая пражывае ў вёсцы Дубна Мастоўскага раёна.
Калі вы валодаеце якой-небудзь інфармацыяй на гэты конт або пацярпелі ад яе дзеянняў, звярніцеся ў Кастрычніцкае РУУС г.Гродна або паведаміце па тэлефоне 102.