БЕЛ Ł РУС

Швецыя спыніла расследаванне па справе аб выбухах на «Паўночных патоках»

7.02.2024 / 12:50

Nashaniva.com

Пракуратура Швецыі афіцыйна паведаміла, што спыняе расследаванне па справе аб выбухах на «Паўночных патоках». У прэс-рэлізе ведамства гаворыцца, што справа знаходзіцца па-за юрысдыкцыяй Швецыі. Папярэдняе расследаванне не выявіла прыкмет таго, што да выбухаў у міжнародных водах маглі быць датычныя ўлады або грамадзяне краіны.

Расследаванне працягвае Германія, з якой улады Швецыі абменьваліся інфармацыяй, гаворыцца ў паведамленні пракуратуры. Таксама шведскі бок падчас расследавання супрацоўнічаў з уладамі Даніі. 

Выбухі на «Паўночных патоках» адбыліся на ўчастку ў Балтыйскім моры ў верасні 2022 года. Па даных The Washington Post, дыверсію каардынаваў украінскі палкоўнік Раман Чарвінскі.

Сам вайсковец, які ўтрымліваецца ў кіеўскім СІЗА паводле абвінавачвання ў перавышэнні службовых паўнамоцтваў, адмаўляе сваё дачыненне да выбухаў.

Газаправоды «Паўночны паток — 1» і «Паўночны паток — 2» каштавалі 17 млрд еўра. «Газпрам» заяўляў, што тэхнічна магчыма адрамантаваць разарваныя трубаправоды. Аднак планаў рамонту і перазапуску ў рэальнасці няма: Масква не бачыць перспектыў паляпшэння стасункаў з Захадам, каб трубы зноў спатрэбіліся для прапампоўкі газу.

Чытайце таксама:

Расія пахавала газаправоды «Паўночны паток» — Reuters

Экспарт расійскага трубаправоднага газу ў Еўропу абваліўся да постсавецкага мінімуму

Чаму Еўропа не замерзла без расійскага газу. І ці доўга яна яшчэ пратрымаецца?

Чытайце таксама:

Каментары да артыкула