У Расіі нацыяналізуюць найбуйнейшую макаронную фабрыку «Макфа»
СМІ назвалі суму арыштаваных актываў па пазове аб канфіскацыі «Макфы» — 100 трлн. расійскіх рублёў (больш за 1 трыльён еўра). Гэта сума перавышае рублёвую грашовую масу ў звароце РФ.
Судовы прыстаў наклаў арышт на рахункі і актывы сваякоў экс-дэпутата Дзярждумы Вадзіма Белавусава і былога губернатара Чалябінскай вобласці Міхаіла Юрэвіча для забеспячэння пазову Генпракуратуры аб спагнанні маёмасці найбуйнейшага ў Расіі вытворцы макароны «Макфа» і афіляваных фірмаў у інтарэсах дзяржавы, піша РБК.
У пастанове прыстава гаворыцца, што сума арыштаваных актываў складае 100 трлн. рублёў, паведамляе, азнаёміўшыся з дакументам, ТАСС.
Указаная сума перавышае рублёвую грашовую масу ў звароце (агрэгат М2): па даных ЦБ РФ, на 1 сакавіка яна складала 99,4 трлн руб. Ва ўрадзе пытанне РБК аб анамальнай суме, указанай у дакументах прыставаў, пераадрасавалі ў Генпракуратуру РФ.
Таксама па рашэнні Цэнтральнага раённага суда Чалябінска арыштаваныя 100% акцый афіляваных з «Макфа» і яе ўладальнікамі кампаній. Гэтыя меры закранулі «Першы хлебакамбінат», «СМАК», «Новая пяцігодка», «Даўгоўскае» і іншых.
Генпракуратура РФ лічыць, што «Макфа» і шэраг іншых прадпрыемстваў, уключаючы «Смак» і «Чалябінскаблгаз», маюць карупцыйнае паходжанне, паколькі іх бенефіцыяры — Юрэвіч і Белавусаў — займаліся бізнесам, працуючы ў органах дзяржулады, і «на працягу многіх гадоў парушалі ўстаноўленыя антыкарупцыйным» заканадаўствам забароны і абмежаванні», пісаў «Коммерсант».
Юрэвіч з 2000 па 2005 год быў дэпутатам Дзярждумы, затым да 2010 года ўзначальваў Чэлябінск, а пасля да 2014 года — Чалябінскую вобласць. Белавусаў з 2011 па 2023 год быў дэпутатам трох скліканняў Дзярждумы РФ.
Чытайце таксама:
Пуцін даручыў зрабіць эканоміку Расіі чацвёртай у свеце да 2030 года
Беларусь ператворыцца ў Паўночную Карэю ці да такога не дойдзе?