Улады гэтага нямецкага горада прызналі, што ён сумны і непрыгожы
Тут амаль не бывае турыстаў.
Фота: Wikimedia Commons
У Ройтлінгене ў федэральнай зямлі Бадэн-Вюртэмберг на поўдні Германіі пражываюць больш за 100 000 чалавек. Чвэрць старога горада згарэла ў Другую сусветную, далёка не ўсе кварталы адноўлены, піша Bild.
Тамака амаль не бывае турыстаў. Мясцовыя ўлады запусцілі PR-кампанію для прыцягнення ўвагі да горада. Стаўку зрабілі на антырэкламу, размясціўшы на чыгуначным вакзале і вуліцах такія плакаты:
- «На жаль, павінны табе паведаміць: ты ў Ройтлінгене»
- «Ройтлінген не можа табе падабацца»
- «Жывем там, куды ніхто не прыязджае ў адпачынак»
- «Нішто так не сумна, як цікавы дзень у Ройтлінгене»
- «Ён проста 10 з 10. Але ён з Ройтлінгена»
PR-спецыяліст Пітэр Грэгарыа з Мюнхена заявіў Bild, што такая кампанія «прыцягвае кароткатэрміновую ўвагу», але ўсё залежыць ад далейшых дзеянняў мэрыі. У найбліжэйшыя дні тая абяцае склікаць прэс-канферэнцыю і растлумачыць, што азначаюць гэтыя плакаты. На сайце Bild запушчана інтэрактыўнае апытанне пра акцыю. Дзве трэці рэспандэнтаў падтрымалі яе, бо яна абуджае цікавасць да горада.