Палітвязню Дзмітрыю Слуку хочуць узмацніць пакаранне
Палітвязня затрымалі 10 лютага 2023 года. Пасля 10 сутак у ІЧУ на Акрэсціна яго перавялі ў СІЗА. Яго абвінавацілі ў «фінансаванні тэрарыстычнай дзейнасці» паводле арт. 290-1 КК.
Паводле следства, Дзмітрый «перавёў крыптавалюту на віртуальны кашалёк тэрарыстычнай арганізацыі ў суме эквівалентнай 2 160 даляраў ЗША, што на момант здзяйснення злачынства склала не менш за 5,4 тыс. рублёў».
Суд прызначыў яму 8 гадоў і 6 месяцаў калоніі са штрафам у памеры 300 базавых велічынь (11,1 тыс. рублёў).
Тэрмін яго накіравалі адбываць у віцебскую калонію № 3. Па ініцыятыве адміністрацыі Дзмітрыю хочуць узмацніць пакаранне. Суд па замене рэжыму ўтрымання на турэмны адбудзецца ў Віцебску сёння, 24 чэрвеня. Рашэнне будзе прымаць суддзя Міхаіл Зубеня, піша «Вясна».
Падтрымаць Дзмітрыя: ПК № 3. 211322, Віцебская вобласць, п. Віцьба, Слук Дзмітрый Васільевіч