Са дна Дуная ў Сербіі пачалі падымаць Чарнаморскі флот Трэцяга рэйха
Маштабная аперацыя па ўзняцці са дна Дуная флоту нацысцкай Германіі пачалася ў раёне горада Прахава ў Сербіі. Караблі 80 гадоў таму былі затопленыя, каб не дасталіся Чырвонай арміі, піша Bild.
Фота: vesicg/Instagram
У 1944 годзе нацысцкая Германія хацела эвакуіраваць больш за 200 баявых караблёў і грузавых суднаў Чарнаморскага флоту і Дунайскай флатыліі. Іх планавалі падняць уверх па Дунаі да тэрыторыі Германіі. Але ў жніўні Чырвоная армія выйшла на бераг ракі вышэй па цячэнні і заблакавала праход.
Тады караблі вырашылі затапіць. Так яны і ляжалі на дне ракі да нашых дзён, замінаючы пры гэтым суднаходству. Штогод міма Прахава праходзяць да тысячы суднаў, у тым ліку круізных лайнераў, а пасля засухі лета 2022 года і падзення ўзроўню вады ў рацэ праблема паўстала асабліва востра.
Еўрасаюз выдзеліў на падняцце нямецкіх караблёў 30 мільёнаў еўра. У сераду са дна паднялі першы з іх, а ў найбліжэйшыя месяцы збіраюцца дастаць яшчэ 20. Пасля ў планах падыманне яшчэ каля 80 штук. Асаблівую цяжкасць складае праверка выбухоўкі на борце і яе размініраванне.
Foto: vesicg/Instagram
Сербскія ўлады абяцаюць, што частку патанулага нацысцкага флоту выставяць на ўсеагульны агляд.
Чытайце таксама:
Украінцы патапілі расійскую падводную лодку «Растоў-на-Доне»