«Рамштайн» адмянілі з-за Байдэна
Сустрэчу па Украіне ў фармаце «Рамштайн» адмянілі пасля таго, як стала вядома, што на яе не прыедзе прэзідэнт ЗША Джо Байдэн з-за ўрагану «Мілтан». Пра гэта паведамілі дзве крыніцы ў НАТА для «Радыё Свабода».
President.gov.ua
Саміт павінен быў адбыцца ў Германіі з 10 па 13 кастрычніка. Планавалася, што на яго прыбудуць каля дваццаці лідараў дзяржаў або іх урадаў, а прэзідэнт Украіны Уладзімір Зяленскі прадставіць свой «план перамогі».
Учора, 8 кастрычніка, украінскі бок таксама абвясціў, што другі саміт міру, які Кіеў планаваў правесці ў лістападзе, перанесены на пазнейшы тэрмін.
Напярэдадні Байдэн адклаў сваю паездку ў Германію «для таго, каб кантраляваць падрыхтоўку да ўрагану «Мілтан» і меры рэагавання на яго», гаворыцца ў заяве Белага дома. Паведамляецца, што «Мілтан» абрынецца на Фларыду сёння ўначы, і зараз хуткасць яго ветру дасягае 260 кіламетраў у гадзіну. Улады заклікалі да эвакуацыі больш за 5,5 мільёна чалавек і тэрмінова прыбіраюць абломкі ад папярэдняга ўрагану «Хелен».
Сустрэчы ў фармаце «Рамштайн», таксама вядомыя як сустрэчы Кантактнай групы па абароне Украіны, праводзяцца рэгулярна пасля ўварвання Расіі ва Украіну. У гэтых зборах удзельнічаюць прадстаўнікі ваенных ведамстваў больш чым 50 краін.