Сэнсацыя на US Open
У сераду 17-гадовая беларуска Вікторыя Азаранка перамагла зорку сусьветнага тэнісу Анастасію Мыскіну
Апоўначы па менскім часе ў Нью-Ёрку скончыўся матч паміж Максімам Мірным і паўднёваафрыканцам Уэсьлі Мудзі. Гэтая гульня, як і дзьве іншыя з удзелам беларусаў, мусіла прайсьці ў аўторак, аднак некалькі разоў адкладалася праз дождж ды ўрэшце была перанесеная на сераду.
Матч доўжыўся пяць сэтаў і скончыўся паразай беларускага тэнісіста, які так і ня здолеў пераадолець першага кругу – 4:6, 6:4, 4:6, 7:6, 4:6. Прычым у апошнім сэце Максім аддаў апошнюю падачу.
Праўда, беларус працягне барацьбу ў парным разрадзе. У першым крузе ён і швэд Ёнас Б’ёркман згуляюць супраць аўстралійца Стэфана Хаса і ... Ўэсьлі Мудзі. Між іншым, беларуска-швэдзкі тандэм лічыцца на US Open другім па сіле.
Сэнсацыя здарылася ў жанчын. 17-гадовая беларуска Вікторыя Азаранка, якая яшчэ год таму гуляла ў юніёрскім разрадзе, перамагла знакамітую і «зорную» Анастасію Мыскіну (Расея) – 6:4, 6:2.
Зазначым, што Вікторыя займае 124-е месца ў рэйтынгу Жаночай тэніснай асацыяцыі (WTA), Анаcтасія – пераможца Ралян Гарос у 2004 г. – знаходзіцца на 12-й пазыцыі.
У наступным раўндзе Вікторыя сустрэнецца з 19-гадовай амэрыканкай Джэмі Джэксан, якая займае 57-е месца ў сусьветнай клясыфікацыі.
Цікава, што беларусачка, якая першы год выступае на паўнацэнных дарослых спаборніцтвах, раней на турнірах Вялікага Шлему, далей за першы круг не праходзіла. І на Аўстраліан Оўпэн, і на Ралян Гарос, і на Ўімбэлдане яна сканчала барацьбу ў першым крузе.
Таксама ў сераду Тацяна Пучак прайграла ўкраінцы Юліі Фядак зь лікам 5:7, 3:6 і спыніла барацьбу ў адзіночным разрадзе.
У жаночым парным разрадзе будзе выступаць Настасься Якімава, якая ў панядзелак выбыла з індывідуальнага. У дуэце з чэшкай Эвай Бірнэравай беларуска згуляе супраць амэрыканак Алексы Глэч і Эбігейл Сьпёрс.