Справу аб давядзенні беларускага экс-палітвязня да самагубства ў Польшчы даўно закрылі
Былы палітзняволены з Гродна Кірыл Кетурка скончыў жыццё самагубствам у Цэнтры ўтрымання пад вартай у Варшаве-Служэўцы ў лістападзе 2023 года. Тады варшаўская пракуратура распачала справу аб давядзенні да самагубства. Аднак аказалася, што ў тым жа самым годзе справу і закрылі. Пра гэта рэдакцыя выдання Hrodna.life даведалася з адказу пракуратуры.
Кірыл Кетурка. Скрыншот перадачы «Мы вернемся»
«Падчас расследавання не было ўстаноўлена, што хто-небудзь спрыяў смерці нябожчыка», — сказаў прэс-сакратар акруговай пракуратуры ў Варшаве Пётр Скіба.
Таму справу па арт. 151 КК Польшчы «Давядзенне да самагубства» закрылі 7 снежня 2023 года — у сувязі з адсутнасцю складу забароненага дзеяння. Пракурор раённай пракуратуры Варшава-Урсынаў у Варшаве зацвердзіў рашэнне.
Кірылу Кетурку было 19 гадоў, калі ён збег ад узмацнення жорсткасці «хатняй хіміі» ў Беларусі, якую ён атрымаў за ўдзел у пратэстах-2020.
Хлопец жыў у Варшаве і трапіў у цэнтр утрымання пад вартай у Варшаве-Служэўцы за махлярства. Гродзенцу пагражала ад 6 месяцаў да 8 гадоў пазбаўлення волі. Знаёмыя хлопца назвалі яго «пешкай» у гэтай справе.
У СІЗА раніцай 20 кастрычніка яго знайшлі павешаным. Праз месяц польская турэмная служба паведаміла, што не знайшла парушэнняў у дзеяннях персаналу.
Чытайце таксама:
«Не выявілі парушэнняў». У Польшчы пракаментавалі самагубства беларускага палітвязня ў СІЗА
«Самая бяспечная х…ня». Як працуюць заліўшчыкі, з-за якіх мог павесіцца былы беларускі палітвязень
У следчым ізалятары Варшавы знайшлі павешаным 19-гадовага хлопца, былога палітвязня з Гродна