У Браславе за «экстрэмізм» судзілі ўдзельніка прапагандысцкага аўтапрабегу
28 лютага ў судзе Браслаўскага раёна адзначылася імя Віктара Нукшы (без імя па бацьку). Мужчыну ставілі ў віну ч. 2 арт. 19.11 КаАП РБ — «распаўсюд экстрэмісцкіх матэрыялаў», заўважыў тэлеграм-канал «Витебск, я гуляю!»
Пры гэтым газета «СБ-Беларусь сегодня» пісала ў верасні 2021 года пра браслаўчаніна з такімі персанальнымі данымі як пра ўдзельніка аўтапрабегу «Сімвал адзінства».
Віктар Нукша тады выказаўся, што ўдзельнічае ў гэтым мерапрыемстве ўсёй сям'ёй:
«Жывем у Браславе, але вырашылі ехаць разам з усімі ад Пастаў. Правядзем аўтакалону да Верхнядзвінска — і дадому, хоць з задавальненнем праехалі б увесь віцебскі маршрут. З некаторымі хлопцамі нават паспеў пасябраваць, уяўляеце? А наогул, за час правядзення аўтапрабегаў для сябе канчаткова пераканаўся: сіла народа — у яго згуртаванасці».
Іншага Віктара Нукшу знайсці не ўдалося, таму ёсць высокая верагоднасць, што гэта адзін і той жа чалавек.
Чытайце таксама:
Яшчэ адну супрацоўніцу «Пеленга» судзяць за «заклікі да прычынення шкоды Беларусі»
Аналітыка Андрэя Паротнікава прыгаварылі да 10 год зняволення