У Магілёве гарэў будынак прадпрыемства па перапрацоўцы шын
Ратавальнікі ліквідавалі пажар, які ўзнік у будынку аднаго з прадпрыемстваў Магілёва, паведамілі ў Магілёўскім абласным упраўленні МНС.
Фота: МНС
Паводле даных МНС, агонь узнік у будынку, які належыць ТАА «Данатон». Кампанія спецыялізуецца на перапрацоўцы зношаных шын, пакрышак і гуматэхнічных вырабаў, а таксама вытворчасці гумовай крошкі.
У памяшканні цэха знаходзілася 50 тон грануляванай гумы.
«У выніку пажару пашкоджаныя дзве тоны грануляванага кардоннага валакна, закураныя сцены і столь у цэху», — паведамілі ў МНС.
Пацярпелых у выніку інцыдэнту няма, бо пажар адбыўся ўначы і работнікаў кампаніі ў цэху не было.
Цяпер высвятляецца прычына надзвычайнага здарэння. У якасці адной з версій разглядаецца самазагаранне здробненай фракцыі грануляванага валакна.