Разам з Януковічам у Мінск прыбылі 11 высокапастаўленых украінскіх чыноўнікаў
Стаў вядомы склад украінскай дэлегацыі, якая прыбыла ў Мінск 29 красавіка разам з прэзідэнтам Віктарам Януковічам.
Як паведамляе сайт прэзідэнта Украіны, у склад дэлегацыі ўваходзяць кіраўнік Адміністрацыі прэзідэнта Сяргей Лёвачкін, першы віцэ‑прэм’ер Андрэй Клюеў, віцэ‑прэм’ер Віктар Слаута, а таксама сем міністраў — замежных спраў Канстанцін Грышчанка, аховы навакольнага асяроддзя Віктар Бойка, эканомікі Васіль Цушко, транспарту і сувязі Канстанцін Яфіменка, паліва і энергетыкі Юрый Бойка, фінансаў Фёдар Ярашэнка, культуры Міхаіл Куліняк і кіраўнік Дзяржаўнай пагранічнай службы Мікалай Літвін.
Члены дэлегацыі возьмуць удзел у пашыраных перамовах, якія пройдуць у Адміністрацыі прэзідэнта Беларусі пасля сустрэчы Аляксандра Лукашэнкі з Віктарам Януковічам у фармаце «сам‑насам». Па выніках перамоў запланавана падпісанне шэрагу двухбаковых дакументаў, паведамляе сайт прэзідэнта Украіны.