У Кіеве ўжо 16 параненых у выніку расійскай атакі, у тым ліку дзіця
У выніку начной ракетнай атакі па сталіцы Украіны пацярпелі некалькі чалавек.
Кіраўнік Кіеўскай гарадской вайсковай адміністрацыі Ціму́р Ткачэнка расказаў, што колькасць пацярпелых у выніку атакі расійскіх дронаў і ракет вырасла да 16. Паводле яго слоў, сярод параненых — 10‑гадовае дзіця.
Паводле слоў Ткачэнкі, у Абалонскім раёне Кіева гараць сёмы і дзявяты паверхі жылога дома.
Акрамя таго, у Святошынскім раёне таксама ўзнік пажар у жылым будынку (раней паведамлялася толькі, што там загарэўся прыватны дом), адбыліся таксама загаранні ў Дэснянскім раёне.
У Шаўчэнкаўскім раёне Кіева гарыць адміністратыўны будынак, піша Ткачэнка.
Украінскія ўлады паведамляюць, што ў выніку расійскага абстрэлу Кіева пашкоджаны каля 10 шматкватэрных жылых дамоў.