Дэпутату ад АдГ пакінулі ў сіле штраф 20 тысяч еўра за ферму з цыбуляй у Беларусі
Адміністрацыйны суд Лейпцыга пастанавіў, што рашэнне аб штрафе дэпутату парламента зямлі Саксонія ад ультраправай партыі «Альтэрнатыва для Германіі» Ёргу Дорнау за ўтойванне бізнэсу ў Беларусі было законным, піша DW Беларусь са спасылкай на AFP.
Ёрг Дорнау
Першапачаткова штраф 20 862 еўра быў накладзены на Дорнау парламентам зямлі ў жніўні 2024 года за тое, што ён у вызначаны законам тэрмін не паведаміў уладам пра тое, што валодае доляй прадпрыемства ў вырошчванні цыбулі «Цыбулька-Бел» пад Лідай і быў яго дырэктарам. Дэпутат абскардзіў рашэнне, сцвярджаючы, што не быў абавязаны паведамляць пра ферму, а штраф занадта вялікі.
Цяпер Дорнау можа абскардзіць адхіленне сваёй апеляцыі ў Вышэйшым адміністрацыйным судзе Саксоніі.
Да працы на ферме на дамоўленасць з Цэнтрам ізаляцыі правапарушальнікаў прыцягвалі і асуджаных беларусаў, у тым ліку паводле палітычных артыкулаў, і Дорнау пра гэта ведаў. Пракуратура Лейпцыга ў снежні 2024 года з юрыдычных прычынаў адмовілася ад пачатку расследавання ў дачыненні Дорнау.