Украіна трэці раз за тыдзень нанесла ўдары па расійскіх нафтагазавых аб'ектах у Каспійскім моры
Як паведамляюць крыніцы выдання Hromadske, 15 снежня ўкраінскія дроны атакавалі платформу на нафтагазакандэнсатным радовішчы імя Карчагіна. У выніку былі пашкоджаныя ключавыя элементы абсталявання, што прывяло да спынення здабычы. Аперацыю правяла Служба бяспекі Украіны.
Радовішча імя Карчагіна. Фота: «Лукойл»
Гэта ўжо трэцяя атака на расійскую нафтагазавую інфраструктуру ў Каспійскім моры за апошнія дні. 11 снежня дроны СБУ ўдарылі па платформе на радовішчы імя Філаноўскага, а на наступны дзень атака была паўтораная — ужо па аб’екце, праз які нафта пастаўляецца на экспарт праз Каспійскі трубаправодны кансорцыум. Тады ж упершыню была пашкоджаная платформа на радовішчы імя Карчагіна.
У выніку гэтых удараў была спыненая здабыча нафты і газу больш як на 20 свідравінах, а таксама пашкоджана важнае абсталяванне на абедзвюх лёдаўстойлівых платформах. Усе аб’екты належаць кампаніі «Лукойл-Ніжняволжскнафта».
Радовішча імя Карчагіна, адкрытае ў 2000 годзе, знаходзіцца ў паўночнай частцы шэльфа Каспійскага мора прыкладна за 180 кіламетраў ад Астрахані. Ягоныя запасы ацэньваюцца на 28,8 мільёна тон нафты і 63,3 мільярда кубаметраў газу. Радовішча імя Філаноўскага лічыцца адным з найбуйнейшых разведаных у Расіі і ў яе сектары Каспійскага мора — з запасамі каля 129 мільёнаў тон нафты і 30 мільярдаў кубаметраў газу.
Чытайце таксама:
Z-блогер прызнаўся, як украінцам удалося знішчыць расійскую падлодку коштам паўмільярда даляраў
УСУ нанеслі ўдар па газаперапрацоўчым заводзе ў Астрахані
Украіна нанесла ўдар па нафтаздабыўнай платформе «Лукойла» ў Каспійскім моры