Туск ацаніў шанцы на прыпыненне агню да Калядаў
Прэм’ер-міністр Польшчы Дональд Туск зрабіў прагноз адносна спынення агню ва Украіне да Калядаў 25 снежня, адзначыўшы, што гэта, хутчэй за ўсё, малаверагодна. Пра гэта ён сказаў у інтэрв’ю парталу Onet.
Дональд Туск. Фота: Henry Nicholls, Pool Photo via AP
Адказваючы на пытанне, ці бачыць ён нейкія перспектывы магчымага спынення агню паміж Украінай і Расіяй да святаў, ён заявіў, што «расіяне, верагодна, цяпер не надта зацікаўленыя ў мірных перамовах або спыненні агню».
«Таму патрэбны яшчэ большы ціск і дэманстрацыя таго, што мы, як Захад, сапраўды не дазволім сябе падзяліць. І тады гэтыя перамовы маглі б набыць канкрэтную форму. Але да Калядаў гэта мне здаецца вельмі малаверагодным», — падкрэсліў Туск.