У Беларусі пастрожылі патрабаванні да ламбардаў
У Беларусі ўвялі новыя патрабаванні да ламбардаў. Гэта прадугледжана ўказам Лукашэнкі, які ўдасканальвае рэгуляванне мікрафінансавай дзейнасці, паведамляе Office Life.
Фота: Яндэкс-карты
Як паведаміў намеснік начальніка галоўнага ўпраўлення Нацбанка Мікалай Дзік, калі прадмет, здадзены ў ламбард, быў набыты, але пасля па яго звярнуўся ўладальнік з патрабаваннем вярнуць маёмасць, ламбард будзе абавязаны кампенсаваць страты сумленнаму пакупніку. Паколькі ламбард недастаткова пракантраляваў у сваіх бізнэс-працэсах момант пацвярджэння таго, што прадмет закладу сапраўды належаў чалавеку, які яго заклаў.
Дадаткова да ламбардаў устанаўліваюцца патрабаванні да дзелавой рэпутацыі кіраўнікоў і бенефіцыярных уладальнікаў гэтай юрыдычнай асобы. На думку Нацбанка, гэта будзе стымуляваць бізнес да большай сацыяльнай адказнасці.
У цэлым, як падкрэслілі ў Нацбанку, указ змяняе дзеючы падыход да вызначэння мікрафінансавай дзейнасці. Цяпер такой дзейнасцю будзе лічыцца заключэнне нават аднаго мікрапазыку. Раней патрабавалася два і больш выпадкі.
Аператары сотавай сувязі таксама атрымалі права прадастаўляць спажывецкія мікрапазыкі ў памеры да 200 базавых велічынь (сёння — 8400 рублёў, з 1 студзеня — 9000 рублёў). На такую ж суму атрымалі права прадастаўляць мікрапазыкі і ламбарды — без закладу і за кошт сродкаў аператараў анлайн-пазыкі. Раней мікрапазыкі былі толькі залогавымі, падкрэсліў Мікалай Дзік.
Акрамя таго, у Нацбанку ўдакладнілі, што дакументам забаронена камерцыйным мікрафінансавым арганізацыям прыцягваць у пазыку ад уласнікаў маёмасці, іх заснавальнікаў (удзельнікаў) грашовыя сродкі на кабальных умовах, гэта значыць з выплатай працэнтаў за карыстанне ў памеры, які перавышае ўстаноўлены рэгулятарам максімальны ўзровень.
Таксама забаронена прадастаўляць уласнікам маёмасці, заснавальнікам (удзельнікам), работнікам такой арганізацыі і Нацыянальнага банка пазыкі на льготных умовах — без выплаты працэнтаў за карыстанне імі або з выплатай працэнтаў у памеры ніжэйшым за ўстаноўлены Нацыянальным банкам максімальны ўзровень.