У Мінску дабудоўваюць сучасны дзіцячы садок з басейнам
Дзіцячы садок на 230 месцаў знаходзіцца ў межах вуліц Ваўпшасава — Ключавая — Таёжная.
«Мінскбуд» паказаў, як выглядае новы дзіцячы садок на 230 месцаў. Будынак ужо цалкам гатовы звонку: завершаны фасады, добраўпарадкавана тэрыторыя, усталяваны ценявыя навесы і гульнявыя пляцоўкі.
Зараз асноўныя сілы будаўнікоў засяроджаны на ўнутраным аздабленні. У некаторых групах на трэцім паверсе ўжо паклалі штучны дубовы паркет і пафарбавалі сцены.
Асаблівая ўвага нададзена басейну — яго чаша паспяхова прайшла выпрабаванні на герметычнасць і рыхтуецца да абліцоўвання пліткай. Таксама ў будынку мантуюць падвясныя столі і агароджы на лесвіцах.
У праекце прадугледжаны музычная і ўніверсальная залы, камп’ютарны гульнявы пакой, а таксама іншыя спецыяльныя памяшканні для творчасці і гурткоў.
Увод аб'екта ў эксплуатацыю запланаваны на 2026 год.