У Мінску махляры ажанілі мужчыну, каб завалодаць ягонай кватэрай
Пракуратура Партызанскага раёна Мінска накіравала ў суд крымінальную справу супраць 51‑гадовага мужчыны і 59‑гадовай жанчыны, якія раней ужо мелі судзімасці. Іх абвінавачваюць у махлярстве на вельмі вялікую суму.
Здымак ілюстрацыйны. Фота: freepik.com
Следства высветліла, што ў чэрвені 2021 года абвінавачаныя знайшлі 63‑гадовага мужчыну з псіхічнымі праблемамі і падманам ажанілі яго са сваёй знаёмай. Прыкладна праз месяц пасля таго яны аформілі даверанасць ад імя мужчыны, якая давала жонцы права распараджацца маёмасцю мужа.
Скарыстаўшыся гэтым даручэннем, яны аформілі куплю-продаж кватэры ў Мінску, перапісаўшы яе на сваяка абвінавачанай і фактычна завалодаўшы маёмасцю пацярпелага, які працягваў у ёй жыць.
Пасля гэтага кватэру прадалі 58‑гадовай жанчыне, скарыстаўшыся яе недасведчанасцю ў пытаннях здзелак, і атрымалі 32 тысячы даляраў ЗША.
Падчас папярэдняга следства ўсе ўгоды былі аспрэчаныя пракуратурай і прызнаныя судом несапраўднымі.
Чытайце таксама:
12‑гадовы хлопчык аддаў грошы бацькоў махлярам
Жанчына забрала 28 тысяч даляраў з кватэры дачкі і зяця ды перадала аферыстам