У Маскве расстралялі намесніка кіраўніка ГРУ
Генерал-лейтэнанта Уладзіміра Аляксеева падсцераглі каля ліфта ў доме на паўночным захадзе Масквы.
Замах адбыўся ў жылым доме на Валакаламскай шашы, паведамляюць расійскія СМІ. Нападнік падпільнаваў генерала, стоячы на сходах, і калі той выйшаў у хол ліфта, стрэліў у яго тройчы. Стралка шукаюць.
Уладзіміра Аляксеева шпіталізавалі. Паведамляецца, што яго стан цяжкі.
Аляксееў нарадзіўся ў Вінніцкай вобласці Украіны, скончыў Разанскую вайсковую вучэльню. У 2011 годзе быў прызначаны начальнікам штаба — першым намеснікам начальніка Галоўнага ўпраўлення Мінабароны, вядомага пад старой абрэвіятурай ГРУ. Падчас грамадзянскай вайны ў Сірыі камандаваў там расійскімі сіламі.
ГРУ — арганізатар забойстваў і дыверсій ва ўсім свеце.