41‑гадовая Ліндсі Вон з цяжкой траўмай нагі выйшла на трасу, але ўпала ў самым пачатку спуску ВІДЭА
За тыдзень да пачатку Алімпіяды амерыканская гарналыжніца атрымала траўму на трэніроўцы
Падчас хуткаснага спуску на хуткасці каля 100 км/г яна ўрэзалася ў ахоўныя сеткі. Жанчына атрымала разрыў крыжападобных звязак калена, разрыў меніску. Узніклі асцярогі, што ёй давядзецца прапусціць Алімпійскія гульні ў Італіі.
Але алімпійская чэмпіёнка 2010 года заявіла, што будзе выступаць. Сёння ў гарналыжным спуску яна выйшла на трасу пад 13‑м нумарам.
Літаральна праз некалькі секунд пасля пачатку спуску, яна, здаецца, няправільна нахілілася, лыжы перакрыжаваліся, і Ліндсі з усяе сілы грымнулася на схіл.
На стадыёне запанавала цішыня, Вон нерухома ляжала некалькі секунд, а потым моцна закрычала.
Да яе кінуліся таварышы з каманды і дактары. Ліндсі крычала, калі яе аглядалі. Гарналыжніцу эвакуявалі на верталёце.
Спаборніцтвы былі спыненыя.