Зорка брэйкдансу з Віцебска атрымаў 11 гадоў турмы ў Кітаі. Што здарылася?
Беларускі брэйк-дансер Мікіта Селязнёў, вядомы ў танцавальнай супольнасці пад нікам Wild Jerry, ужо больш за год знаходзіцца ў кітайскай турме. Паводле яго сяброў, працэс па справе Мікіты праходзіў у закрытым рэжыме, яму далі 11 гадоў зняволення. Цяпер танцор падаў апеляцыю, а яго сябры збіраюць грошы на адваката.
Мікіта Селязнёў. Фота: сацсеткі
Хто такі Мікіта Селязнёў
Мікіта Селязнёў родам з Віцебска. У беларускім брэйку ён адзін з найбольш прыкметных танцораў свайго пакалення. Ён выступаў на міжнародных спаборніцтвах і фестывалях, замежных брэйк-батлах і шоу.
Мікіта са сваёй дзяўчынай, якая таксама танцуе брэйк-данс. Фота: інстаграм Міікіты
Мікіта трапіў у фінал сусветнага чэмпіянату па брэйкінгу Red Bull BC One — аднаго з галоўных турніраў у гэтай культуры. Для танцора трапіць у фінал BC One прыкладна тое ж, што для спартсмена выступіць на Алімпійскіх гульнях.
Фота: інстаграм Мікіты
У супольнасці Мікіту апісваюць як «танцора, які ўмеў працаваць на вялікай сцэне і на камерным батле аднолькава ўпэўнена».
Фота: інстаграм Мікіты
Апошні пост Мікіты Селязнёва ў інстаграме датуецца 1 снежня 2024 года, ён тады вярнуўся ў Беларусь пасля выступу на чэмпіянаце па брэйк-дансу ў Маскве.
Фота: інстаграм Мікіты
На яго старонцы можна знайсці шмат відэа з вулічнымі танцамі ў розных азіяцкіх краінах, найбольш — з Кітая.
Скрын з відэа, дзе Мікіта танцуе на адной з вуліц Шанхая
Што здарылася ў Кітаі
Паводле інфармацыі ад сяброў, Мікіту затрымалі ў Пекіне, куды ён паехаў на працу, 21 снежня 2024 года. З таго часу ён знаходзіцца за кратамі ў Кітаі. Суд быў закрыты, родныя і сябры не бачылі матэрыялаў справы, сутнасць абвінавачвання невядомая. Вядома толькі пра наведванне сауны з «новымі знаёмымі» і начлег у прыватным пакоі, пасля якога адбылося затрыманне.
На днях стаў вядомы прысуд — 11 гадоў пазбаўлення волі. Мікіта падаў апеляцыю, разгляд яго абскарджання адбудзецца цягам месяца. Паслугі адваката каштуюць 10 тысяч даляраў. Сябры і блізкія Мікіты абвясцілі збор.
Фота з тэлеграма каманды Мікіты @help_wildjerry
За што ў Кітаі могуць даць 11 гадоў турмы
Кітайская крымінальная сістэма даволі жорсткая і часта прадугледжвае вялікія тэрміны за дзеянні, якія ў Еўропе маглі б лічыцца менш цяжкімі.
Прысуд у 10‑12 гадоў можа пагражаць, напрыклад, за наркотыкі (нават за невялікія аб’ёмы), арганізацыю або ўдзел у незаконных вечарынах з наркотыкамі, сур’ёзныя парушэнні міграцыйнага заканадаўства ў спалучэнні з іншымі артыкуламі і іншае.