У вёсцы, на якую нядаўна зрабілі налёт расійскія падлеткі, затрымалі мужчыну з наркотыкамі
У Смалявіцкім раёне распачалі крымінальную справу ў дачыненні да 41‑гадовага жыхара вёскі Будагова. Мужчыну, які нідзе не працуе, падазраюць у незаконным захоўванні асабліва небяспечнага псіхатропнага рэчыва — тэтрагідраканабінолу, паведамляе сайт smolevichi-24.by.
Фота ілюстрацыйнае
Па звестках Следчага камітэта, у мужчыны знайшлі не менш за 2,11 грама небяспечнага рэчыва. Справу завялі паводле часткі 1 артыкула 328 Крымінальнага кодэкса Беларусі, якая прадугледжвае адказнасць за незаконнае набыццё, захоўванне, перавозку або выраб наркатычных сродкаў і псіхатропных рэчываў без мэты збыту.
Санкцыя артыкула прадугледжвае пакаранне ад абмежавання волі да пяці гадоў або пазбаўлення волі на тэрмін ад двух да пяці гадоў. Мужчыну затрымалі і змясцілі пад варту. Паводле заканадаўства, ужо сам факт захоўвання забароненага рэчыва лічыцца завершаным складам злачынства.
Ці звязана справа гэтага мужчыны з нядаўнім налётам расійскіх падлеткаў на адзін з катэджаў у гэтым населеным пункце, які, магчыма, таксама мог быць звязаны з наркатычнымі справамі, не паведамляецца.
Чытайце таксама:
«Кубракоў — малайчына!». Лукашэнка пахваліў дзейнасць міліцыі падчас нападу ў Смалявіцкім раёне
Падрабязнасці нападу падлеткаў з бітай і пісталетамі на катэдж у Смалявіцкім раёне